Naniniwala si Quezon City mayoralty candidate Mike Defensor na malaking bentahe para sa mga estudyante ang kaalaman tungkol sa makabagong teknolohiya ngayon, kung kaya pagtutuunan nito ng pansin ang pagpapalakas sa Information Technology skills ng mga mag-aaral sa lungsod.

“Sa panahon ngayon, nakalalamang ang mga mayroong kaalaman sa computer at internet kumpara sa wala. Kaya naman nais kong pagtuunan ng pansin ang pagtutulak sa pag-aangat ng antas ng mga pasilidad at iba pang kagamitang pang - Information Technology sa lahat ng pampublikong paaralan sa ating lungsod,” ani Defensor.

Nais ni Defensor na manguna ang Quezon City sa pag-hulma ng mga mag-aaral na bihasa sa IT at iba pang larangan ng makabagong teknolohiya.

“Sa kalaunan, lahat ng mag-aaral sa high school sa ating lungsod ay magtatapos bitbit ang kaalaman sa makabagong teknolohiya. Ang Quezon City ay magtutustos ng mga high school graduates na bihasa sa IT para mapaghandaan ng mga batang ito ang kanilang pag-aaral sa kolehiyo o kaya’y ang paghahanap ng trabaho,” dagdag ni Defensor.

Kasabay nito, naniniwala rin si Defensor na malaki ang pangangailangan na suportahan ng pamahalaang lokal ang mga pangangailangan ng mga guro upang palakasin ang kanilang kaalaman hinggil sa mga subject na English, Mathematics at Science.

“Para maging bihasa ang kabataan sa IT ay kinakailangan nila ng mga guro na may taglay na husay sa mga asignaturang Ingles, Matematika at Agham. Tulungan natin ang ating mga guro sa pampublikong paaralan na palakasin ang kanilang kaalaman sa pamamagitan ng mga pagsasanay at makabagong teknolohiya sa edukasyon,” ani Defensor.

Samantala, habang nais nitong itaas ang kaalaman ng mga mag-aaral sa makabagong teknolohiya, nais din ni Defensor na isabay ang values education at formation sapagkat ito ay mabisang pundasyon upang lumaking responsable at kapakipakinabang na mga mamamayan ang bawat mag-aaral.